係台灣想行夜街當然就係去行夜市啦，今次旅程四日三夜中去咗三個夜市，
有一個係臨時加落去既，因為其中一個夜市實在太唔值得行，
以下就會講下三個夜市同埋台灣街頭小食！
寧夏夜市
呢個夜市不得了，係多人都不得了，仲要係好多跟團既大陸人，
人多都算啦，兩邊位置好窄，就算睇岩野想買黎食要行入去都好難，
行左一段已經無咩心機再行落去，
其實食物只係一般，又無咩睇，不過無理由特登黎到唔買啲野食下嫁...
最後都食咗好幾樣野，總共用咗NT395，去相比大家睇下啦，
「三星蔥肉卷」味道唔錯，要排隊買，啲蔥仲有有啲生生地
「檸檬愛玉」食完啲濃味野，最好飲返杯清清地又解渴既飲品，唔太甜，不錯
「爆漿雞腿卷」係一條無骨既雞肉，燒完之後可以加味粉，最大路米係椒鹽啦
呢一舊野唔記得咩名堂，但十分之中伏，成舊野都無味，有蛋有蝦，食咗兩啖就放咗佢去垃圾桶，千萬唔好食
呢個夜市既最後一站就係去咗一間野食「藥燉排骨」「涼拌麵」「牛肉麵」
最期待係個排骨，但點知好食既竟然係涼拌麵，其餘兩樣都一般，
藥燉排骨無咩藥味，比較淡，而牛肉麵就普通水準，試過就唔會再食呢間野！
由於寧夏夜市實在太令人失望，而且時間仲早，就決定轉戰去師大夜市。
師大夜市
同寧夏夜市好唔同，多年青人，多野睇，多女仔衫買，條路都寬好多，行得比較舒服，
如果你係後生仔女去台灣，就要行下呢個夜市啦，總共用了NT353
「手抓餅」好想食手抓餅好耐啦，終於可以食到，有好多款味選擇，有得加蛋，
最後我地揀咗芝士同粟米，又平又食得飽
「大腸麵線」去台灣唔一定係食阿宗麵線，其實普通一碗已經好好食
行行下去到一間型格麵包舖叫「一之軒」，見到好多都好靚好想買黎食，但又唔想食麵包浪費咗個肚啲位，
買咗綠豆糕，葡撻，土風梨酥，牛軋糖
饒河街夜市
本身諗住去呢個夜市係搭的士去既，但係最後改變咗，都係坐捷運去五分埔再行過去，
一黎平啲，二黎可以行下五分埔，途中我地買咗「宜蘭蔥餅」食，終於食得返蔥餅，好好食
大約15-20分鐘就行到夜市啦！呢個夜市好行好多，都多人，不過條路夠寬，又多野睇，總共行咗兩次，
「爆漿芋」係一舊炸野，入面有芋頭餡，都ok既
「金蛋爆漿玉子燒」見好多人買就試下啦，人氣NO.1既係明太子，就試一試啦，味道無咩驚喜
「十全藥燉排骨」「魯肉飯」食過呢間就知寧夏夜市食個間係唔好食，
好多人食，可以坐低食，
藥燉排骨個味似肉骨茶，魯肉飯啲肉唔似一般食開係肉碎，而係肥肉，必食
「冬瓜茶」識飲當然要飲冬瓜茶啦，好多冬瓜茶都比較甜，但呢杯就岩岩好
「蓮霧」台灣既蓮霧又大又甜，唔食唔得啦
仲有食咗圖中呢樣野，唔個佢叫咩名，食落好Q，凍凍地，有好多味，幾好食嫁
最後一樣就係要排隊買既「胡椒餅」食咗就好後悔，唔好食既，點解咁多人買
講完幾個夜市就講下其他小食啦，首先講咗7-11先啦！
「溫泉蛋」NT38一包有兩隻，有個傻人日日食，仲掃咗十包返香港
「涼拌麵」買返酒店宵夜就最岩，都好好食，平平地係7-11都可以食得飽
之後講下西門町附近既小食啦，「楊記花生玉米冰」係我地plan咗要去食，佢比較早收舖，
試過夜晚9點幾去買，已經關門了，都要早啲去買，呢個冰要比個讚佢，好好食，唔似一般芋圓，
入面有冰，有粟米，有花生，有小丸子，芋圓等，NT90大大碗，抵食
「鹽水雞」又係一樣好好食既野，有好多唔同既配料㨂，之後會撈埋配料同雞，加鹽水，胡椒粉調味
「白苦瓜汁」去咗幾次台灣都無試過，今次點都要試下，真係唔苦，幾解渴！
Comments